شەرقىي تۈركىستاندا ئۇيغۇر تۈركلىرىنىڭ بېشىغا كەلگەنلەرنى دۇنياغا ئاڭلىتىدىغان سەنئەت ئەسەرلىرىگە يەنە بىر يېڭىسى قوشۇلدى. ئىنگلىزچە ئېيتىلغان «I Am East Turkestan» ناخشىسى 2026-يىلى 8-نويابىر تۇرغاي ئېۋرەننىڭ YouTube قانىلىدا ئېلان قىلىندى.
ناخشىنىڭ تېكىستىنى ئېزىلگەن خەلقلەرنىڭ ئاۋازىنى مۇزىكىغا ئېلىپ كىرىشى بىلەن تونۇلغان شائىر ۋە ناخشا تېكىستى يازغۇچى تۇرغاي ئېۋرەن يازدى. ئاھاڭىنى لوس ئانجېلېستا تۇرۇۋاتقان مۇزىكانت ئەلى تولغا دەمىرتاش ئىشلىگەن بولۇپ، ئەسەر مۇزىكا پائالىيىتىنى شىۋىتسارىيەدە داۋاملاشتۇرۇۋاتقان ئەكرەم كاي مارستوننىڭ ئورۇنلىشىدا ئاڭلىغۇچىلار بىلەن يۈز كۆرۈشتى.
ناخشا شەرقىي تۈركىستاننىڭ ئېچىنىشلىق ھېكايىسىنى دۇنياغا ئاڭلىتىش ۋە دۇنيا مىقياسىدىكى ئاڭلىغۇچىلارغا يېتىپ بېرىش ئۈچۈن ئىنگلىز تىلىدا تەييارلاندى.
تۇنجى ناخشىنى دېللا مايلىز ئورۇنلىغانىدى
«I Am East Turkestan» تۇرغاي ئېۋرەننىڭ شەرقىي تۈركىستان ئۈچۈن يازغان تۇنجى ناخشىسى ئەمەس. ئېۋرەن تېكىستىنى يازغان «East Turkistan» ناخشىسى 2023-يىلىنىڭ بېشىدا ئامېرىكىلىق سول (soul) ناخشىچىسى دېللا مايلىزنىڭ ئورۇنلىشىدا ئېلان قىلىنغانىدى. كەسپىي ھاياتىدا مايكل جېكسون ۋە ۋىتنى خيۇستونغا جۆر ناخشىچى بولغان ۋە ئۇزۇن يىللاردىن بېرى تۈركىيەدە ياشاۋاتقان بۇ سەنئەتكار ناخشىنىڭ دۇنياۋى تەسىر قوزغىشىدا مۇھىم رول ئوينىغانىدى.
ئىنگلىزچە ئېيتىلغان «East Turkistan» تۈركىيەدىكى ئۇيغۇرلارمۇ چۈشىنەلىسۇن دەپ تۈركچە تەرجىمە خېتى بىلەن ھەمبەھىرلەنگەنىدى. ناخشا خەلقئارا مەتبۇئاتلاردا خەۋەر قىلىندى ۋە دۇنيانىڭ ھەرقايسى جايلىرىدا شەرقىي تۈركىستان ئۈچۈن ئۆتكۈزۈلگەن نامايىشلاردا قويۇلدى. ئامستېردامنىڭ دام مەيدانىدا ۋە كانادانىڭ تورونتو شەھىرىدە ئۆتكۈزۈلگەن نامايىشلار شۇلارنىڭ جۈملىسىدىندۇر.
ئوخشاش گۇرۇپپا يەنە بىر يەرگە جەم بولدى
يېڭى ناخشا تۇرغاي ئېۋرەن بىلەن ئەلى تولغا دەمىرتاشنىڭ ھەمكارلىقىنى داۋاملاشتۇرماقتا. ئەكرەم كاي مارستونمۇ گۇرۇپپىغا يات ئەمەس. ئۈچ سەنئەتكار 2021-يىلى كەشمىر ئۈچۈن تەييارلانغان «I Am Kashmir» ناخشىسىدىمۇ بىرلىكتە ئىشلىگەنىدى.
ئېۋرەن شەرقىي تۈركىستاندىن باشقا كەشمىر، پەلەستىن، سۇدان ۋە باشقا رايونلاردا يۈز بېرىۋاتقان ئىنسانىي پاجىئەلەرنىمۇ ناخشىلىرىغا ئېلىپ كىرمەكتە. ئۇ «I Am East Turkestan» بىلەن شەرقىي تۈركىستاننىڭ ئاۋازىنى مۇزىكا ئارقىلىق دۇنياغا ئاڭلىتىش تىرىشچانلىقىنى داۋاملاشتۇرماقتا.





